Ennanadakkuthu

Latest Post



தமிழக அரசு பாடத்திட்டத்தில் யோகா மற்றும் சாலை விதிகள் விரைவில் சேர்க்கப்படும் என பள்ளிக் கல்வித்துறை அமைச்சர் செங்கோட்டையன் கூறியுள்ளார். சென்னை விருகம்பாக்கத்தில் பாடப்புத்தகம் வழங்கும் விழாவில் பங்கேற்ற பி்ன்னர் செய்தியாளர்களிடம் பேசிய அவர், தனியாருக்கு இணையாக தமிழக பள்ளிக்கல்வித் துறை திகழ்வதாக பெருமிதம் தெரிவித்தார். அரசுப் பள்ளி மாணவர்களுக்கு பாடநூல், சீருடை உள்ளிட்டவை வழங்க ஏற்பாடுகள் செய்யப்பட்டுள்ளதாக தெரிவித்தார். சுமார் 1.3 லட்சம் மாணவர்களுக்கு பாடநூல் உள்ளிட்ட 14 பொருட்களை விநியோகிக்க அரசு ஏற்பாடு செய்துள்ளதாக குறிப்பிட்டார்.

மேலும் பேசிய அவர் மாணவர்கள், மத்திய அரசு தேர்வுகளை எதிர்கொள்ளும் வகையில் சிறப்பு பயிற்சி மையங்கள் அமைக்கப்படும் என்றார். அந்த மையங்களில் சிறந்த ஆசிரியர்களை கொண்டு மாணவர்களுக்கு பயிற்சி அளிக்கப்படும் என்றார். தமிழகத்தில் நீட் தேர்வு கொண்டுவரக் கூடாது என தொடர்ந்து வலியுறுத்தி வருவதாக குறிப்பிட்டார். பள்ளிக்கல்வித் துறை சார்ந்த 40 அறிவிப்புகள் மானியக் கோரிக்கையின் போது அறிவிக்கப்படும் என்றார். பிளஸ் 1 படிக்கும் மாணவர்களுக்கு மாதிரி வினாத்தாள் தயாரிக்கும் பணிகள் நடைபெற்று வருவதாக கூறினார்.



இந்திய கிரிக்கெட் அணியின் பயிற்சியாளர் கும்பிளேவின் பதவி காலம் சாம்பியன்ஸ் கோப்பை போட்டியுடன் முடிவடைகிறது. அவர் தொடர்ந்து அந்த பதவியில் நீடிப்பார் என்று எதிர்பார்க்கப்பட்ட நிலையில், புதிய பயிற்சியாளர் தேர்வுக்கான விண்ணப்பங்கள் வரவேற்கப்படுவதாக இந்திய கிரிக்கெட் வாரியம் சார்பில் சமீபத்தில் அறிவிக்கப்பட்டது. பயிற்சியாளர் கும்பிளே, கேப்டன் விராட்கோலி இடையிலான கருத்து வேறுபாடு காரணமாகவே புதிய பயிற்சியாளர் தேர்வுக்கான அறிவிப்பு வெளியானதாக செய்திகள் வெளியாயின. 

கும்பிளே ஒரு தலைமை ஆசிரியர் போல் வீரர்களிடம் கண்டிப்புடன் நடந்து கொள்வதாகவும், ஆடும் லெவன் வீரர்கள் தேர்வு வி‌ஷயத்தில் விராட்கோலிக்கும், கும்பிளேவுக்கு இடையே பிரச்சினை நிலவுவதாகவும் கூறப்பட்டது. ஆனால் இந்த தகவல் மறுக்கவும் பட்டது.

இந்நிலையில் இந்திய கிரிக்கெட் அணியின் பயிற்சியாளர் பணிக்கு மீண்டும் அனில் கும்பிளே விண்ணப்பித்து உள்ளார். இந்திய கிரிக்கெட் வாரியத்திற்கு அனில் கும்பிளே தன்னுடைய விண்ணப்பத்தை அனுப்பி உள்ளார் என தகவல்கள் வெளியாகி உள்ளது. இஎஸ்பிஎன் கிரிக்இன்ஃபோ தகவலின்படி, பயிற்சியாளர் பணிக்கு இந்திய கிரிக்கெட் வாரியம் விண்ணப்பம் கோரியதுமே, அனில் கும்பிளே முதலாவதாக விண்ணப்பத்தை அனுப்பி உள்ளார். தன்னுடைய சிவி மட்டுமின்றி இந்திய அணியின் எதிர்கால செயல்திட்டம் தொடர்பாகவும் அறிக்கையை அனில் கும்பிளே தாக்கல் செய்து உள்ளார் என தெரியவந்து உள்ளது.

இந்திய கிரிக்கெட் அணியின் பயிற்சியாளர் பணிக்கு அனில் கும்பிளேவுடன் மேலும் 5 பேர் போட்டியில் உள்ளனர். முன்னாள் ஆஸ்திரேலிய கிரிக்கெட் வீரர் டாம் மூடியும் விண்ணப்பித்து உள்ளார். டாம் மூடி இலங்கை அணியின் முன்னாள் பயிற்சியாளர். இப்போது சன்ரைசர்ஸ் ஐதரபாத் அணிக்கு பயிற்சியாளராக உள்ளார். இங்கிலாந்தில் பிறந்த ரிச்சர்ட் அலெக்சாண்டர் பைபசும் விண்ணப்பித்து உள்ளார். பாகிஸ்தான் மற்றும் வங்காளதேச தேசிய அணிகளின் பயிற்சியாளராக இருந்தவர். இப்போது வெஸ்ட் இண்டீஸ் கிரிக்கெட் வாரிய இயக்குநராக பணியாற்றி வருகிறார். 

முன்னாள் இந்திய கிரிக்கெட் வீரர் லால்சந்த் ராஜ்புத்தும் விண்ணப்பித்து உள்ளார். லால்சந்த் இப்போது ஆப்கானிஸ்தான் தேசிய அணியின் தலைமை பயிற்சியாளராக உள்ளார். தோட்டா கணேஷ் மற்றும் இந்திய அணியின் முன்னாள் நட்சத்திர வீரர் விரேந்திர சேவாக்கும் இப்போட்டியில் இணைந்து உள்ளனர். சச்சின், கங்குலி மற்றும் விவிஎஸ் லட்சுமணன் அடங்கிய கிரிக்கெட் ஆலோசகர் கமிட்டியே பயிற்சியாளரை தேர்வு செய்ய உள்ளது. இங்கிலாந்தில் நடைபெற்று வரும் சாம்பியன்ஸ் கோப்பை போட்டி முடிவதற்குள் பயிற்சியாளரை தேர்வு செய்யும் விதமாக விண்ணப்பதாரர்களின் நேர்முகத்தேர்வுக்கு தேதிகளை முடிவு செய்வது தொடர்பாக இக்குழு பிசிசிஐயுடன் ஆலோசிக்க உள்ளது. புதிய பயிற்சியாளருடன் பிசிசிஐ இரண்டு வருடங்களுக்கு ஒப்பந்தம் செய்துக் கொள்ளும் எனவும் தெரிகிறது.



எடப்பாடி பழனிசாமிக்கு 122 எம்.எல்.ஏ.க்கள் ஆதரவு அளித்து  வருகிறார்கள். இதில் 11 பேர் டி.டி.வி.தினகரனுக்கு ஆதரவாக செயல்படுவதுடன் எடப்பாடி பழனிசாமி அரசுக்கு மறைமுகமாக மிரட்டல் விடுத்து வருகிறார்கள்.

11 பேரும் திடீரென்று போர்க்கொடி உயர்த்தி ஆட்சி கவிழ்ப்பு முயற்சியில் ஈடுபடுவார்களோ என்ற அச்சமும் எடப்பாடி பழனிசாமி அணியினருக்கு ஏற்பட்டுள்ளது.

எடப்பாடி பழனிசாமி அணியினருக்கும், டி.டி.வி.தினகரன் அணியினருக்கும் இடையேயான மோதல் முற்றியது. அமைச்சர் ஜெயக்குமார் அறிவிப்பை எதிர்த்தும், தினகரனுக்கு ஆதரவாகவும், வெற்றிவேல், தங்க தமிழ்ச் செல்வன் உள்ளிட்ட ஆதரவு எம்.எல்.ஏ.க்கள் மீண்டும் குரல்கொடுத்தனர்.தினகரனை நீக்க இவர்களுக்கு அதிகாரம் இல்லாத நிலையில் அவர்களுக்கு அந்த அதிகாரத்தை கொடுத்தது யார்? என்று கேள்வி எழுப்பி உள்ளனர். இதனால் அ.தி.மு.க.வில் கட்சியிலும், ஆட்சியிலும் மீண்டும் நெருக்கடி உருவாகியுள்ளது.

நேற்று காலை டி.டி.வி.தினகரனை  27  எம்.எல்.ஏக்கள் வரை சந்தித்து ஆதரவு தெரிவித்து உள்ளனர்.நேற்று மட்டும் 16 எம்.எல்.ஏக்கள்  தினகரனை சந்தித்து உள்ளனர். இன்றும் தொடர்ந்து பல எம்.எல்.ஏக்கள் அவரை சந்தித்து வருகின்றனர்.

MKRdezign

Contact Form

Name

Email *

Message *

Powered by Blogger.
Javascript DisablePlease Enable Javascript To See All Widget